![](https://img.bomboradyo.com/baguio/2022/01/teenage-pregnancy.jpg)
BAGUIO CITY – Ngimmato iti 46.43% ti kaso ti teen age pregnancy iti Cordillera idi 2020.
Iti panakiuman ti Bombo Radyo Baguio, kinuna ni Commission on Population (POPCOM)-Cordillera Regional Director Magdalena Abellera a buklen daytoy ti 2,422 nga ubbing ti nagsikog idi 2020 no sadino nangatngato no idilig iti 1,654 a nairrekordda idi 2019.
Dinakamatna a nailista ti Benguet ti kangatoan a kaso ti teen pregnancy a ngimmato iti 272% a katukad ti 361 manipud iti 97 a nailistada idi 2019.
Sarunoen daytoy ti Apayao a nakailista ti 141% a buklen ti 379 a kaso; Abra a 62% a buklen ti 386 a kaso, Ifugao a 329, Baguio City a 455.
Agpada met a naksayan ti kaso ti teenage pregnancy ti Kalinga ken Mt. Province a nakailista iti 225 ken 297 a kaso.
Sigun kenni Abellera, agtawen iti 10 agingga 14 ti kaubingan a nagsikog iti rehion kabayatan ti nasao a tawen.
Innayona a kangrunaan a rason iti nasapa a panagsikog ket ti panagbaliw ti kauugali ken pisikal a galad dagiti agtutubo.
Nakaapektar metlaeng ditoy ti parental authority no sadino saanen a mabantayan dagiti nagannak dagiti ubbingda gapu iti panagtrabahoda iti ballasiw-taaw.
Malaksid iti daytoy, ad-ado pay ti oras a mabusbosbos dagiti ubbing iti panagbuyada ti social media.
Gpu iti daytoy, nalidayan ni Abellera gaputa kangrunaan nga implikasion ti teen age pregnancy ket ti panagsardeng nga agadal dagiti estudyante a mangitunda met iti nababa nga employment rate ti maysa a komunidad.