BAGUIO CITY – Maipasdek sadiay Tabuk City, Kalinga ti kaunaan nga RT-PCR laboratory iti Rehiyon Cordillera a pinonduan ti lokal a gobyerno.
Iti panakiyuman ti Bombo Radyo Baguio, impannakkel ni Tabuk City Mayor Darwin Estrañero a resulta daytoy ti nasayod a panagplano ti lokal a gobyerno ken dagiti nagduduma nga stakeholders sadiay.
Imbinglayna a kalkalpas laeng ti inspeksionda iti pakaibangonan ti laboratorio.
Dinakamatna a manamnama nga ipaay met ti Department of Health ita a lawas ti permit para iti operasyon ti nasao a pasilidad.
Sigun kenkuana, dumanon iti agingga 96 nga specimens ti mabalin nga iproseso ti COVID-19 testing lab iti innoras nga agresulta tapnu saandan a mangipatulod ti specimens iti siudad ti Baguio.
Kabayatanna, impannakkel pay ni Mayor Estrañero a dandanin malpas ti 100-bed capacity nga isolation facility ti lokal a gobyerno ti Tabuk City a masarakan sadiay Barangay Agbannawag.
Imbinglayna met laeng a mangilatang ti lokal a gobyerno ti Tabuk City iti P40-M para iti panakagatang dagiti bakuna kontra iti COVID-19 para kadagiti umili sadiay.
Naamuan nga iti agdama ket mabakbakunaan kontra iti COVID-19 dagiti tattao sadiay Tabuk City a karaman iti A3 Category wenno dagiti indibidual nga addaan ti comorbidity wenno sakit.
