Agtaltalinaed a nakarekep ti Kennon Road para kadagiti amin a motorista gapu iti manarimaan a konstruksyon iti bypass road idiay Camp 2 Tuba,Benguet kasta metten ti Acro Bridge a mangipaay iti alternate route kadagiti motorista.
Dagiti nadakamat a konstruksyon ket manamnama a maileppas inton sumaruno a dua wenno tallo a lawas sigun iti Department of Public Works and Highways-Cordillera.
Mainaig iti dayta,adda metlaeng ti maipwesto a Police Checkpoint iti nadakamat a kalsada a mangkemmeg kadigiti aglabsing a motorista.
Gapu iti dayta, dagiti laeng pedestrian ti mapalubusan a dumalyasat iti Camp 2, Kennon Road iti agdama.
Maipalagip nga immunan a naipaiyulog ti pakdaar a pinirmaan ti maseknan nga opisyal ti Metro BLISTT Development Authority ken ni Baguio City Mayor Benjamin Magalong seknan iti temporaryo a panakirekep ti Kennon Road kadagiti motorista.
