BAGUIO CITY – Nairikep ti Kennon Road kadagiti motorista ita a weekend agingga iti alas-sais ti agsapa inton April 8, Lunes.
Iti panakiyuman ti Bombo Radyo kenni Police Major James Acod, hepe ti Tuba Municipal Police Station, kinunana a daytoy ket para met laeng iti kinatalged dagiti motorista.
Kinunana nga adda dagiti batbato nga agtintinnag iti nasao a kalsada nangruna iti paset ti Camp 5.
Innayonna a dagiti laeng residente iti masakupan ti Kennon Road ti mapalubusan a dumalyasat sadiay.
Dinakamat pay ni Acod nga adda ti sertipikasion dagiti residente sadiay a nasken nga ipakitada kadagiti otoridad tapno mapaneknekan a residente dagitoy iti masakupan ti Kennon Road.
Maipalagip a kadagiti napalabas a weekend ket nailukat ti Kennon Road kadagiti light vehicles ngem ita ket nakarikep daytoy kas maitunos iti pammilin ti Office of Civil Defense.
Kabayatanna, mangiruar ti Kennon Road Task Force iti kanayonan nga advisory para inton sumaruno a weekend.
Maguyguyuguy dagiti motorista a mangaramat kadagiti alternatibo a kalsada paturong iti Baguio kas iti Baguio – Bauang Road wenno Naguillian Road, Marcos Highway wenno Aspiras Palispis Road ken ti Asin – Nangalisan – San Pascual – Tubao Road.
