BAGUIO CITY – Posible a saan a palubusan ti lokal a gobierno ti La Trinidad, Benguet ti kiddaw a panag-shooting ti maysa a kompanya para iti maysa a pelikula a maisayangkat iti nagduduma a tourist sites iti masakupan ti munisipyo.
Sigun kenni Mayor Romeo Salda, napagnumuan ti Municipal IATF a saanda pay a mangited ti permit ken saanda a palubusan ti nasao a shooting.
Dinakamatna a nakaawatda ti surat ti production management ti maysa a pelikula a mangkidkiddaw iti panakaipalubos ti nasao a shooting.
Nupay kasta, kinunana a saan a kompleto ti detalye ti kiddaw gaputa saan a nakalanad no kaano a mangrugi, dagiti partikular a tourist site ken dadduma pay a napapateg nga impormasyon a kasapulanda kuma.
Innayon ni Mayor Salda a maamakda a mangipalubos iti shooting gaputa nailanad iti surat nga adda dagiti ganganaet a karaman iti cast ti maaramid a pelikula ken saanda nga ammo ti pagtaudan dagitoy a pagilian.
Inlawlawagna pay a ti saanda a panangipalubos iti panagshooting ti nasao a pelikula sadiay La Trinidad ket paset ti panagridamda kontra iti possible a panagraira ti Delta variant ti COVID-19.
