Mangnamnama ti Kilusang Mayo Uno-Cordillera a maaprobaran ti kiddaw dagitoy a P1,200 a Family Living wage a makabiyag a sueldo nangruna ket ngumatngato ti presyo dagiti gagatangen.
Iti panakiuman ti Bombo Radyo kenni Mike Cabangon, dadaulo ti Kilusang Mayo Uno-Cordillera, kinunana nga awan pay ti makitkitana a panagngato ti sueldo dagiti mangmangged iti pribado a sektor nangruna ket mamingsan laeng iti tunggal tawen a mabalin a ngumato ti sueldo dagitoy.
Nupay kasta, impeksa ni Cabangon a ti basaran kuma iti panagngato ti sueldo dagiti mangmangged ket ti inflation.
Kabayatanna, kinuna ni Cabangon a nu panggep ti gobyerno a magun-od ti minimum wage kadagiti amin a mangmangged ket nasken a maipasa iti kamara ti wage increase kadagiti pribado a sektor.
Innayon pay ti dadaulo ti kilusang Mayo Uno-Cordillera a ti nailatang a P26 million iti Ayuda para sa Kapos ang Kita Program (AKAP) para kadagiti mangmangged ket ad-adda a napinpintas nu saan a maipaay kas ayuda.
Kinuna ni Cabangon a daytoy ket mabalin a ma-corrupt wenno sabali ti pagturonganna.
Inyunay-unayna pay a nasken nga ipangpangruna ti gobyerno ti across-the-board wage hike ken saan kuma nga isakit ti Department of Labor and Employment (DOLE) dagiti Top 100 corporations.
