Agbalbalin a karit ti panakaimplementar ti Republic Act 10586 wenno ti “Anti-Drunk and Drugged Driving Act of 2013” iti siudad ti Baguio gapu iti kinaawan ti alcoholic breathalyzer test.
Iti panakiuman ti Bombo Radyo kenni Benny Bomogao, councilor ti siudad ti Baguio, impakaamona a manipud naaramid ti linteg nga Anti-Drunk and Drugged Driving Act idi tawen 2013 ket awan pay ti nagat-gatang a breathalyzer test iti siudad ti Baguio wenno iti rehiyon Cordillera.
No pay kasta, mabasa iti nasao a linteg a rumbeng ti panakaadda ti breathalyzer test tunggal tawen.
Sigun kenni Bomogao ti breathalyzer test ket maipapan iti panakaadal ti Blood Alcohol Concentration (BAC) ti maysa a tao a mangipakita iti porsyento ti alcohol iti dara ti bagi daytoy.
No pay kasta, maipatungpal daytoy kalpasan a bimmagsak ti maysa a motorista iti sobriety test a pakairamanan ti eye test, walk-and-run test, ken one leg stand test.
Impeksa ni Bomogao nga iti ado a mapaspasamak nga aksidente iti kalsada ket kangrunnaan a rason ti panakaimpluwensiya dagiti drayber iti arak wenno droga a mangituntunda iti panakapukaw ti biyag, panakadadael dagiti kagawaan ken daduma pay.
Gapu iti dayta, kiddaw ni Bomogao kadagiti implementing agencies a mas paingetenda pay ti panakaipatungpal ti Anti-Drunk and Drugged Driving Act.
Kabayatanna, nagpalagip ti nasao a konsehal kadagiti motorista a rumbeng a liklikanda ti aginum no ammoda nga adda ti byahe wenno papananda ken no nakainom dagitoy, rumbeng a saandan nga ag-iggem ti manibela agsipud ta mabalin a mangitunda daytoy iti aksidente.//Bombo Mera Pacpacan
