BAGUIO CITY – Kaaduan wenno 90% kadagiti drivers ditoy rehion Cordillera ket saan a dimmalan iti pormal a panagsanay iti panagmaneho.
Inaklon daytoy ni Land Transportation Office (LTO) – Cordillera Regional Director Francis Ray Almora kagiddan ti panangkunana a kaaduan kadagiti drivers ditoy rehion ket nagpasuro laeng kadagiti am-ammoda a lisensiado a driver ken saan ket a kadagiti driving schools.
Inlawlawagna a gapu iti daytoy ket adu dagiti paglintegan ken pagalagadan ti LTO a saanda a masursurot a mangituntunda iti parikut iti trapiko ken aksidente kadagiti kalsada.
Inyunay-unayna pay a napateg ti baro a pagalagadan iti LTO Student Permit gaputa sakbay a maipaay ti lisensia ti maysa nga aplikante ket nasken a dumalan daytoy iti umno a panagsanay ken eksaminasyon a pakarukudan no kwalipikado wenno saan dagiti agap-aplikar ti lisensia.
