Kinondenar iti Palasyo Malacañang ti kinaranggas nga inaramid dagiti inawagan daytoy a kriminal a nakipaset iti natalna koma nga anti-corruption protest idi kalman.
Inladawan ni Palace Press Officer Atty. Claire Castro a dagiti adda iti likudan dagiti naranggas a tignay ket saan a protesters nu di ket tulisan.
Sigun kenni Atty.Castro, nalawag a ti gandat dagitoy ket i-discredit wenno ibaba ti gobyerno babaen iti inubrada a krimen.
Maipalagip nga idi kalman, nadangran dagiti sumagmamano a naideploy sadiay Mendiola, Metro Manila gapu iti panangbatbato dagiti rallyista kadakuada.
Malaksid iti dayta, inuram ken sinerrek pay dagiti daduma ti maysa nga hotel idiay Recto Avenue, Manila nu sadino, sigun iti Officer-In-Charge daytoy ket natakaw ti vault ti nasao nga hotel.
Kabayatanna, iti baet ti komitment dagiti kapulisan nga obserbaran ti maximum tolerance,saan latta a naliklikan ti kinranggas a nakadangran nga agpada dagiti sibilyan ken dagiti kameng iti pulisya.
Mainaig iti dayta, kaadwan ket menor de edad dagiti indibidwal a nangbato kadagiti pulis idiay Ayala ken Mendiola kabayatan ti tignay-protesta, sigun kenni Interior Secretary Jonvic Remulla.
Iti imbinglay nga impormasyon ti opisyal, ginandat dagiti menor de edad a serken ken uramen ti Palasyo Malacañang.
Nupay kasta, addan dagiti impaisidongda iti kustodiya a naituding a kaumanda kadwa ti representative manipod iti Department of Social Welfare and Development (DSWD).
