BAGUIO CITY – Natiliw ti 19-anyos a mannalon manipud Tacadang, Kibungan, Benguet kalpasan a nadiskobredagiti otoridad iti imanmanehona a pick-up ti dried marijuana leaves idiay Tublay, Benguet idi laeng agsapa, ita nga aldaw.
Nakumpiskar manipud iti suspek ti agarup 27 kilos ti marijuana bricks a nakakabil iti black trash bag ken tape ken agbalor daytoy iti P3,375,000.
Maibasar iti inisyal nga imbestigasyon ti Tublay Municipal Police Station, manarimaan ti panagpatrolya dagiti pulis idi nakita-da ti maysa a pick-up a nadadaelan ken maysa a motor iti igid ti kalsada.
Inasitgan dagiti operatiba ti lugan tapno tulonganda ngem dagus a timmaray ti driver ti motor bayat a nabati ti driver ti pick-up.
Sinukimat dagitoy ti pick-up ken ditoy a nakita-da a dua a sako ti marijuana.
Iti interview ti Bombo Radyo iti suspek, nagtaud dagiti nakumpiskar a marijuana bricks idiay Tacadang, Kibungan, Benguet ken maideliver daytoy ditoy siudad ti Baguio.
Naamwan a ti suspek ti maikapat kadagitoy nga agkakabsat ken naaramidna ti iligal nga aktibidad gapu iti kinarigat ti biag.
Inaklon ti suspek a sigud a drug surrenderee ti tatang daytoy ngem kinunana a saan a naimpluwensiyaan tapno aramidenna ti iligal nga aktibidad.
Sigun met kenni PMaj. Cris Dagdag, Chief of Police ti Tublay Municipal Police Station, ingetanda pay ti ipatpatungpal dagitoy a foot patrol ken bantayanda dagiti lugan tapno malpada ti iligal a transaction.
Innayona a daytoy ti kaunaan nga iligal drug arrest a nairekord ti municipyo ti Tublay ita a tawen.
Iti agdama, imet ti maseknan nga otoridad ti suspek ken dagiti ebidensya bayat nga an-anupen dagiti maseknan ti naglibas a kadwana.
