TUBA, BENGUET- Imbinglay ni Paeng Valencia, dadaulo ti 911 hotline iti Baguio City, a nagbalin a karit kadakuada ti kinauneg ti rangkis a nakatnagan dagiti innem nga indibidual idiay Sitio Begis, Taloy Sur, Tuba, Benguet.
Iti interview ti Bombo Radyo kenkuana kinunana a narigatan dagitoy a nangbiruk kadagiti biktima agsipud ta nauneg daytoy ken narigatan pay dagitoy apaman nga a nangiyuli wenno nangisang-at kadagiti nasao a biktima.
Maipalagip a napasamak ti nasao nga aksidente itay laeng byernes, Abril diese nuebe iti nasao a lugar a nakatayan dagiti tallo nga indibidual pakairamanan ti 10 anyos a lalaki, bayat a nadangran dagiti tallo a kaduada kalpasan a natnag ti naglugananda a Mitsubishi Montero iti rangkis.
Nabigbig dagiti pimmusay a da Jasper Marcuap, Rodolfo Marcuap, ken ti maysa nga ubing, bin-ig a tubo ti Candelaria, Quezon.
Dagiti met nadangran ket da Kristel Marcuap ken ti kaduada a dua a menor de edad.
Sigun kadagiti otoridad paturong dagitoy iti syudad ti Baguio.
Nupay kasta, naawanan ti control ti driver rason a natnagda iti rangkis.
Naireport a died on the spot da Jasper ken Rodolfo bayat a ti 10-anyos a lalaki ket indeklara ti attending physicians iti Baguio General Hospital and Medical Center (BGHMC) a dead on arrival.
Kabayatanna, inyunay-unay ni Valencia iti publiko a nasken nga agannad tapno maliklikan ti aniaman nga aksidente.
