BAGUIO CITY – Ibalbalakad manen ti Land Transportaton Office (LTO) – Cordillera ti nainget a panagtungpal dagiti amin a lisensiado a drivers kadagiti paglintegan ken pagalagadan ti trapiko.
Inlawlawag ni LTO-Cordillera regional director Francis Ray Almora a babaen iti daytoy ket makapagnumarda programa ti ahensia panakaipaay ti lisensia nga agpaut iti 10 a tawen kadagiti driver’s nga awanan ti aniaman a panaglabsing iti linteg trapiko.
Kinunana a mangrugi inton October 2021 ket asinoman a driver ti lugan nga awanan pulos iti rekord ti panaglabsing iti linteg trapiko ket maipaayan iti lisensia nga agpaut iti 10 a tawen.
Madiskwalipikar met ditoy dagiti driver a maka-aramid ti panaglabsing kas iti panagmaneho a nakainom ti arak ken panagmaneho iti colorum a lugan pakairamanan ti panaglabsing kadagiti ordinansa dagiti barangay wenno lokal a gobyerno.
Dinakamatna metlaeng a masuspindir ti lisensia ti driver no makaurnong daytoy ti 10 demerit points ken nasken a maipasidong iti reorientation course wenno Driving Enhancement Program sakbay a mapalubusan nga agmaneho manen.
Kinunana pay a makanselar ti lisensia ti driver no makaurnong daytoy iti 40 demerit points ken mapawilanen daytoy nga agala ti baro a lisensia iti las-ud ti dua a tawen.
