Impeksa ni Senator Risa Hontiveros a rumbeng nga aklunen itan ti Palasyo Malacañang a nadagsen ti sangsangwen a sitwasyon ti Pilipinas gapu iti mapaspasamak a tension idiay Middle East.
Sigun kenni Senator Hontiveros, saanen nga umdas ti panangmonitor laeng iti sitwasyon kagiddan ti ngumatngato a presyo dagiti produkto a petrolyo rason a kasapulanen ti konkreto a plano tapno sangwen ti mapaspasaran a krisis.
Patien met ni Senator Loren Legarda a saan a rumbeng nga agingga laeng iti plano wenno presentasyon ti addang nga aramiden ti gobyerno para iti agdama a sitwasyon nu di ket rumbeng a marikna daytoy dagiti umili babaen kadagiti konkreto a tulong kas iti taraon, panggedan ken subsidiya wenno tulong-pinansyal.
Kinuna metlaeng ni Senator Legarda a rumbeng a bigbigen ti gobyerno a narigat ti sitwasyon tapno makaaramid iti umno a tignay para iti panakakissay ti nakaro nga epekto ti krisis kadagiti umili.
