Linuktanen ti Department of Education (DepEd) ti online public consultation para iti revised Senior High School (SHS) curriculum babaen ti basic education program a naituding a maipatungpal inton School Year 2025-2026.
Imbinglay ti Department of Education ti duapulo ket innem a panid ti consultation packet a mangpapaigsa iti programa para kadagiti Grade 11 ken 12, a mabalin a maimatangan iti online a manipud Abril 4 agingga Abril 11, 2025.
Awawisen ti nasao nga ahensia ti publiko a mangibinglay ti komento iti narebisar a kurikulum ti SHS, a nagdalan iti panagadal iti mano a tawen tapno maipaay ti ad-adda nga epektibo nga edukasion para kadagiti agtutubo a Pilipino.
Immunan a kinuna ni Education Secretary Sonny Angara a ti pannakaimplementar ti revised SHS curriculum ket naituding a mangrugi iti SY 2025-2026.
Nupay kasta, maibasar iti consultation packet, mangrugi ti pilot implementation inton SY 2025-2026, ken maibasar iti inisial a resulta ti pilot, ipakaammo ti DepEd no kasapulan a maiyemplementar ti amin a senior high schools ti baro a kurikulum inton SY 2026-2027.
