BAGUIO CITY – Pormalen nga inleppas ti committee on urban planning, lands and housing ti lokal a konseho ti Baguio dagiti konsultasyon iti panggep a panakaipasdek ti parking building iti deppaar ti Burnham Park.
Sigun kenni Councilor Edgar Avila, dadaulo ti nasao a komite, uppat a singasing ti opisyal a naiparang iti siudad.
Kinunana a dagitoy ket ti P800 million multi-level mall-hotel-parking plan ti grupo ni Alexander Cruz, ti green structure ti grupo ni RF Chan, ti master development plan ti University of the Cordilleras ken ti Baguio Cultural Center Plan ni architect Tito Valdivia.
Dinakamatna a repasuen ti technical working group dagiti uppat a singasing sakbay dagitoy a maisumitir iti komite para iti kaskenan a rekomendasyon.
Naamuan a napaay ti tallo pay a grupo a mangiparang iti plano dagitoy para iti panggep a maipasdek a paradaan ditoy siudad.
