BAGUIO CITY – Maipatungpal inton Mayo 15 ti umuna a konsultasion seknan iti makidkiddaw a panakaipangato ti plete kadagiti parapasahero a jeep ditoy siudad ti Baguio ken probinsia ti Benguet.
Ipatungpal ti Land Transportation Franchising and Regulatory Board (LTFRB) – Cordillera ti nasao a konsultasyon kas sungbat iti kidkiddawen dagiti jeepney operators iti Baguio-Benguet.
Gapu iti daytoy, kidkiddawen ti LTFRB-Cordillera ti presensia wenno panakipaset dagiti jeepney operators ken drivers iti lokalidad ken ti publiko nangruna dagiti maapektaran a pasahero.
Maibasar iti kiddaw ti Alliance of Jeepney Operators and Drivers Assocations in BLISST, Inc., tarigagayda a mapagbalin a P14 ti plete iti short trip wenno iti umuna nga uppat a kilometro manipud iti agdama nga P8.50.
Kayatda pay a manayonan iti P2 ti tunggal maysa a kilometro manipud iti agdama a P1.40.
Sigun kadagiti maseknan a transport group, ti tarigagayda a panagngato ti plete kadagiti jeep gapu iti ngumin-ngina nga spare parts ken agbaliwbaliw a presyo daigti produkto a petrolyo.
