Manamnama a malpas ti kontruksyon ti overpass sadiay La Trinidad, Benguet inton umay a bulan kas naituding a panakalpas ti nasao a proyekto.
Iti panakiuman ti Bombo Radyo kenni Romeo Salda, mayor ti La Trinidad, Benguet, kinunana a maipaparpartak ti kontruksyon ti overpass no sadino nalpas metten a nabubongan ken naaramid ti stairway iti batog ti nalatak a fast food restaurant.
Sigun kenni Salda, nabayag a napanggep ti panakaaramid ti nasao nga overpass ngem nabayag a nalpas gapu iti napasamak a rebidding ken idi napalabas a tawen laeng a napundoan.
Naitantan met laeng ti nasao a proyekto gapu ta nabaliwan ti mapangpanggep a Y-shape overpass kalpasan a saan a naipalubos nga adda iti bumaba iti batog ti maysa a gasoline station.
Gapu iti dayta, ti Y-shape overpass ket nagbalin a kas L-shape overpass.
Hunyo idi napalabas a tawen idi narugian ti proyekto ken daytoy ket naiggedan iti panakatarimaan iti kalsada manipud Km.3, Stobosa agingga Km. 5, La Trinidad, Benguet.
