Agtultuloy ti kordinasyon dagiti Filipino-Community sadiay Netherlands ken kadagiti kabangibang a lugar kas panangipakita iti suportada kenni sigud a President Rodrigo Duterte.
Iti pannakiuman ti Bombo Radyo kenni Myra Colis, Bombo International News Correspondent sadiay The Netherlands, kinunana nga agtultuloy ti koordinasyon ken mobilization dagiti grupo sadiay para iti sumaruno a panagrally dagitoy.
Kinunana a nupay adu dagiti naipatungpal a rally dagiti pro ken anti Duterte ket adda met a natalna ti aglawlaw ken awan ti insidente a napasamak agsipud ta nainget ti panagbantay dagiti otoridad sadiay.
Impettengna a kasapulan pay nga agala iti permit dagiti amin nga agrally sakbay dagitoy a mapalubusan nga agrally iti aglawlaw ti nasao a pagilian.
Iti agdama, pangpanggepen metlaeng dagiti Filipino-Community sadiay a mangipatungpal iti rally bayat ti aldaw a panagkasangay ti sigud a Presidente.
