Manamnama a mangipaay iti lawag ken ragsak iti siudad ti Baguio ti namaris a “K-Culture” wenno Korean culture inton Mayo babaen iti Korea Festival 2026.
Rambakan iti Korean Cultural Center in the Philippines (KCC) ti mapadpadaanan a piesta iti kadakkelan a mall iti siudad manipod Mayo 9 agingga 10. Manipod idi naiyuswat ti piesta idi 2022, nagbalin a maysa daytoy a kangrunaan nga events iti Korean Cultural Center in the Philippines (KCC), ken ti Baguio City ti napili a lugar para iti agdama a tawen.
Mabalin a kitaen dagiti bisita ti nagduduma nga interactive booths ken themed zones a tampok ti tradisional ken moderno a kultura iti Koreano.
Adda metlaeng dagiti aktibidad a kas iti digital painting, Hangeul pop art, ken panangikawes iti hanbok wenno tradisional a kawes iti Korea.
Iti rabii, tampok dagiti pabuya a pinagkadua ti talento iti Korean ken Filipino performers, karaman ti K-pop cover dances ken tradisional a panagperform.
Karaman metlaeng iti highlights ti performances manipod iti Taekwondo Association, Suwon Gugak Association, ken maysa a lokal a grupo manipod iti siudad ti Baguio.
Maal-allukoy met ti amin a padasen ti sining, kultura, ken ragsak nga ipaay iti Korea Festival 2026.
