Nagpalagip manen ti Korte Suprema a ti kaawan ti umdas a pondo para iti maysa a nationwide campaign ket saan nga umdas a rason tapno dagus a maideklara ti maysa a kandidato a “nuisance candidate”.
Iti maysa a desision nga insurat ni Senior Associate Justice Marvic M.V.F. Leonen, insina ti Korte Suprema En Banc dagiti resolusion ti Commission on Elections (COMELEC) a nangkanselar iti sertipiko ti kandidatura ni Juan Juan Olila Ollesca (Ollesca), maysa nga agtagikua ti negosio, a nagtaray a presidente iti eleksion idi 2022.
Kinuna ti COMELEC a saan nga am-ammo ni Ollesca ken awan ti umdas a pondona.
Sigun iti Korte Suprema, ti kangrunaan a pangibasaran ti pannakaideklara ti nuisance candidate ket ti kinakurang ti pudno a panggep nga agkandidato iti posision iti publiko.
Kinuna pay ti nangato a korte a rumbeng a saan a pangibasaran ti kaadda ti pondo, panagbalin a kameng ti maysa a partido, pannakaam-ammo iti intero a pagilian, wenno ti posibilidad a mangabak iti eleksion.
Inlawlawag ti Korte a napaay ti COMELEC a paneknekan nga awan ti pudno nga intesnion iti timmaray a ni Ollesca.
Palagip ti Korte nga amin nga umili iti maysa a demokrasya, nakurapay man wenno nabakna, ket adda ti karbenganna a tumaray iti maysa a posision iti publiko ngem nasken a mabalanse daytoy kadagiti praktikal a lapped a sangsanguen ti Commission on Elections iti panangitandudo iti nawaya, patas ken natalna nga eleksion.
