BAGUIO CITY – Maipasidongen ti intero a munisipyo ti La Trinidad, Benguet iti dua nga aldaw nga EXTREME ENHANCED COMMUNITY QUARANTINE manipud March 30, aldaw ti Lunes agingga March 31, aldaw ti Martes.
Iti interview ti Bombo Radyo Baguio kenni La Trinidad Mayor Romeo Salda, kinunana a kasaruno daytoy ti waragawag a dua ti kumpirmado a positibo a kaso ti COVID-19 sadiay, partikular iti Barangay Poblacion ken Barangay Puguis.
Sigun kenkuana, kadagiti nasao nga aldaw ket mairikep ti BAPTC ken ti La Trinidad Vegetable Trading Post.
Kinunana a mairikep metlaeng dagiti amin nga establishimento malaksid laeng kadagiti sari-sari stores kadagiti barangay ngem iti laeng alas-9 ti agsapa agingga ala-1 ti malem.
Mairikep pay kadagiti lugan dagiti amin a checkpoints malaksid laeng iti national highway manipud Shilan agingga Km. 3.
Mabalin nga ilabas ti nateng iti national highway ngem saan mabalin nga agdiskarga iti sentro ti munisipyo.
Mailukat ti panagbasura iti aldaw ti Dominggo gaputa awan ti panagkolektar iti basura inton Lunes ken Martes.
