BAGUIO CITY – Natiliw ti maysa a laborer iti naisayangkat nga entrapment operation iti maysa a resort sadiay Asin, Nangalisan, Tuba, Benguet idi kanikadua.
Nabigbig daytoy a ni Jaype Abance De Guzman, 26-anyos ken residente ti Penged, Nangalisan, Tuba, Benguet.
Maibasar iti report, pinagayam ni De Guzman ti lalaki nga anak ti complainant babaen ti social media site a Facebook.
Nagpammarang ti suspek kas maysa a babai ken nangipatulod ti biktima iti lamo-lamo a ladawanna iti suspek.
Kalpasanna, nagkiddaw ti suspek iti P50,000 manipud iti complainant wenno iti ina ti biktima kasukat ti saanna a panangipablaak iti lamo-lamo a ladawan ti biktima.
Nagkamang met ti agina iti pulisya a nagresulta iti panakaisayangkat ti entrapment operation.
Immanamong ti ina ti biktima nga agbayad ti P5,000.
Nagkita dagitoy iti resort a nakaisayangkatan ti entrapment operation a nagresulta iti panakatiliw ti suspek.
