Agingga iti agdama ket awan pay ti pakabigbigan ti maysa nga indibidual a nasarakan nga awanan puot sadiay Marcos Highway idi kalman.
Maibasar iti report, nakaawat iti awag dagiti otoridad manipod iti maysa a maseknan nga umili no sadino nasarakana a nakaidda iti kiosk nga asideg iti maysa nga establishimento ti biktima a nabasbasa gapu iti napigsa a tudo.
Dagos a nagresponde dagiti otoridad ken intaray dagiti kameng ti Emergency Medical Service (EMS) ti nasao nga indibidual iti pagagasan.
Naduktalan dagiti doktor a nakapasar daytoy iti dunor ti ulona.
Nupay kasta, nakaawat iti awag ti Bombo Radyo manipod Baguio General Hospital and Medical Center (BGHMC) a pimmusay ti lalaki iti pasado alas dos idi kalman gapo iti napasaranna a severe traumatic brain injury.
Maipalagip a naudi a nakita ti bangkay a nakasuot iti nangisit a kwintas ken yellow green a t-shirt ken addaan daytoy iti tattoo iti paset ti barukongna.
Iti agdama ket madama iti pannakiyuman ti BCPO Station 10 iti Baguio General Hospital and Medical Center para iti naan-anay a pakabigbigan bankay.
