Nag-viral iti social media ti report dagiti sumagmamano a local media outlets idiay India maipapan iti Bizarre love story da Sikandar Yadav, 45-anyos ken ti katuganganna a babai a ni Geeta Devi, 55-anyos.
Ni Yadav ket nabalo kalpasan a pimmusay ti asawana.
Addaan dagitoy ti dua nga annak.
Nakipagnaed ni Yadav ken dagiti dua nga annakna iti balay dagiti katuganganna iti Heer Moti village, Bihar, India.
Ditoy a nainlove iti tunggal maysa da Yadav ken Devi.
Saan a nagbayag ket naaddaanda ti romantic affair nga inlemedda kadagiti kapamilyada nangruna iti katugangan a lalaki a ni Dileshwar Darve.
Ngem kas iti kunada, awan ti sekreto a saan a maduktalan gapu ta naammoan ken inwaras dagiti marites ti limed nga ayan-ayat da Yadav ken Devi.
Naidanon ti tsismis iti katugangan a lalaki a ni Dileshwar rason a limed a pinaliiwna ti manugang ken ti asawana agingga a napaneknekanna nga adda ti secret affair dagiti dua.
Gapu iti daytoy, inreklamo ni Dileshwar dagiti dua iti Panchayat wenno iti barangay council tapno masolusyonan ti parikut ti pamilyada.
Inaklon met da Yadav ken Devi a nalaos ti panagayatda iti tunggal maysa.
Gapu iti panagpudno dagiti dua, napagdesisyonan ti council a pagbalinen a pormal ti relasyon da Yadav ken Devi babaen iti panagkallaysa.
Napukaw met ti sakit ti nakem ni Dileshwar kontra iti asawa ken manugangna idi nangnegna ti palawagda.
Inakseptarna ti kinapudno a napukawen ti panagayat ti asawana kenkuana.
Dinayaw pay dagiti dadduma ti inaramid ni Dileshwar gapu ta timmulong pay iti pannakaisimpa ti kallaysa ti asawana ken ti manugangna.
Saan met a nalawag nu nagdinna dagiti nadakamat nga indibidual iti maymaysa a ballay.
