--Ads--
BAGUIO CITY – Nakemmeg ti maysa a lalaki gapu iti panaglabsingna iti PD 705 wenno ti Revised Forestry Code of the Philippines sadiay Km. 36, Topdac, Atok, Benguet idi rabii.
Nabigbig daytoy a ni Warrenson Socte Relay, 32-anyos.
Nakaawat ti Atok PNP iti impormasyon manipud iti maseknan nga umili seknan iti panakaibiahe dagiti iligal a naragadi a kaykayo babaen iti maysa a van nga addaan plaka a RDJ 273.
Dagus a nagresponde dagiti pulis, pinara ken sinukimatda ti nasao a lugan, pakairamanan ti linaon daytoy.
Napaay ti driver a mangipakita iti kaskenan a dokumento a nangitunda iti panakakemmegna ken panakakumpiskar ti 120 a pidaso ti 2x3x10 a kayo nga aggatad ti P19,200.
