BAGUIO CITY – Maan-anop itan ti suspek a nangbagbagsol iti tallo nga indibidual a nakatayan ti maysa sadiay Assumption Road, Baguio City idi parbangon kalman.
Nabigbig ti pimmusay a ni James Paul Ngol-do Papay, 21-anyos, baro, tubo ti Talubin, Bontoc, Mt. Province ken residente ti Irisan, Baguio City.
Nabigbig met dagiti nadangran da Michael Busacay Baniaga, 21-anyos, baro ken ni Liam Floyd Busacay Marrero, 19-anyos; agpadada a minero ken residente ti Dalicno, Itogon, Benguet.
Maibasar iti report, killaat a binagsol ti saanpay a nabigbig ti suspek dagiti tallo a biktima kabayatan ti panagurayda iti taxi iti depaar ti Assumption Road.
Naamuan a nagtaud dagiti biktima iti maysa a balay paginuman sadiay Mabini Street ken immakar dagitoy iti Assumption Road a napasamakan ti insidente.
Naiturong dagitoy iti pagagasan ngem naideklara a pimmusay ni Papay. (-with Bombo Nikki Agsiweng)
