BAGUIO CITY – Napangabakan ti Lamut River sadiay Ifugao ti top prize ti kaunaan a RIVERs for Life Award ti Department of Environment and Natural Resources (DENR).
Inabak ti Lamut River dagiti 15 a dadduma pay a river-nominees ken daytoy ket nakaawat iti ₱100,000 cash incentive.
Panggep ti Recognizing Individuals/Institutions Towards Vibrant and Enhanced Rivers wenno RIVERs for Life Award a mabigbig dagiti kadalusan a karayan iti entero a Pilipinas ken maipasigurado ti agnanayon a panagbalin a nadalus dagiti karayan iti pagilian.
Impeksa met ni DENR-Cordillera regional director Ralph Pablo ti nalaus a ragsakna iti pananggun-od ti Lamut River iti nasao a pammadayaw.
Iti panakiyuman ti Bombo Radyo, kinunana pay a nagbunga dagiti amin a bannog ken sakripisyoda iti panangmintinir iti kinadalus ti nadakamat a karayan.
Imbingayna a nangabak ti Lamut River gapu iti napintas a kalidad ti danum, implementasyon ti solid waste management, panagbinnadang ti lokal a gobyerno ken ti epektibo a kampanya kontra iti basura.
Aramaten met ti lokal a gobyerno ti Lamut, Ifugao ti insentiboda iti ad-adda pay a panangpapintasda iti Lamut River. (-with Bombo Nikki Agsiweng/ Bombo Charles Nikko Limon)
