BAGUIO CITY – Agtultuloy ti panagmonitor dagiti maseknan nga opisyales kadwa-da ti Baguio City Police Office, Bureau of Fire Protection, ken City Engineering Office iti kasasaad ti City Camp Lagoon idiay Brgy. Lower Rock Quarry, Baguio City.
Iti interview ti Bombo Radyo kenni Silvino Cominga Jr., Kapitan ti Brgy. Lower Rock Quarry, agturong laeng dagitoy ng agikkat ti basura iti nasao a lagoon nu kumapsot ti tudo.
Sigun kenni Cominga, normal paylaeng ti lebel ti danum ngem paspas a ngumato ti lebel daytoy nu manayonan ti basura.
Maibasar iti obserbasyon dagitoy, kabaelan ti siltation system nga iabsorb ti danum laketdi madalusan ken awan ti basura iti screen daytoy.
Innayona pay nga adda ladta ti nadalusanda a basura kas iti plastik, kawes wenno basahan, kayo, plywood, yero ken daduma pay.
Sigun kenni Cominga, bassiten ti nabati kadagiti suplay nga ar-aramaten dagitoy iti panagdalus nu sadino mamingsan ket awan ti gloves dagitoy nga agpidot kadagiti basura.
Kinunana a sakripisyo ti ar-aramiden dagitoy iti agdama tapno laeng madalusan dagiti sumagmamano a basura a maiyan-anod iti lagoon iti baet nga agkurkurang ti materyales dagitoy para iti nasao nga operasyon.
