Agtaltalinaed a nababa ti lebel ti danum iti Ambuklao Dam sadiay Bokod, Benguet iti baet a mapaspasaranen ti pangtudtudo iti Rehion Cordillera.
Iti panakiuman ti Bombo Radyo kenni Bokod Mayor Thomas K. Wales Jr., kurang latta ti maur-urnong a danum manipod iti panagtudtudo ken mapangato laeng ti lebel ti danum iti nasao a dam nu mapasaranen ti epekto ti La Niña Phenomenon.
Nupay dinakamat ti mayor a saan a kritikal ti kinakurang ti danum iti nasao a dam, addaan latta daytoy ti epekto it produksyon ti Tilapia kas ti napasaran a kinakurang ti suplay daytoy iti merkado.
Dinakamatna a kadagiti napalpalabas a bulan ket kinontrol dagiti mangngalap ti kaado ti tiltiliwenda a Tilapia tapno saan metlaeng a marigatan dagitoy nga agpaado.
Iti agdama, agtaltalinaed a nakaalerto ti lokal a gobyerno ti Bokod, Benguet tapno mabantayan ti lebel ti danum iti Ambuklao Dam.//Bombo Jerwin Aquino
