BAGUIO CITY – Agtaltalinaed nga adda iti lebel a ‘moderate’ ti panaka-aramat dagiti critical care units para iti COVID-19 ditoy rehion Cordillera kas maibasar iti datus ti Department of Health (DOH).
Maibasar iti datus ti DOH-Cordillera, 31.58 percent ti agdama nga occupancy kadagiti pasilidad iti region a para kadagiti pasyente ti COVID-19 wenno katukad ti 18 a pasyente nga agtaltalinaed kadagiti 57 nga Intensive Care Unit (ICU) beds a nailatang para kadagiti pasyente ti COVID-19.
Dumanon met iti 31.28 percent ti isolation bed utilization wenno 152 manipud kadagiti 486 nga isolation beds iti rehion ti naaramat bayat a 27.11 percent ti ward bed utilization wenno 45 manipud kadagiti 166 a ward beds iti rehion ti naaramat.
Innem met manipud kadagiti 33 a mechanical ventilators iti rehion ti naaramat a katukad ti 18.18 percent a panaka-aramat dagiti nasao a makina kadagiti health care facilities iti Cordillera.
Maibasar pay iti datus, ditoy Baguio City, nailista ti 50 percent a panaka-aramat dagiti ICU beds bayat a 31.42 percent iti panaka-aramat dagiti isolation beds.
Nailista met ti Apayao ti kangatuan a porsiento iti panaka-aramat dagiti isolation beds a sinaruno ti Benguet, Kalinga, Ifugao, Mountain Province ken Abra.
Kagiddan iti daytoy, inyunay-unay manen ni DOH-Cordillera Regional Director Dr. Ruby Constantino ti panagtungpal ti publiko kadagiti maipatpatungpal a health protocols tapnu makaliklikda manipud iti COVID-19 ken dadduma a saksakit.
