Impeksa ni Itogon Mayor Bernard S. Waclin a nakasagana ti munisipyu iti Itogon a tumulong iti panangipatungpal iti nagduduma nga infrastructure projects iti sidong iti 2026 General Appropriations Act (GAA), a panggepna a pasayaaten ti panagdur-as kadagiti “rural” a lugar.
Sigun kenni Mayor Waclin, nakapirman ti League of Municipalities, League of Governors, ken League of Cities of the Philippines iti maysa a MOA kadua dagiti ahensia iti gobierno tapno tulungan ti panangimplementar kadagiti proyekto a kas iti school buildings, farm-to-market roads, ken dadduma pay a government infrastructure.
Nupay kasta, kinunana nga ur-urayen pay ti lokal a gobierno ti panangi-download iti earmarked funds manipod kadagiti ahensia a kas iti Department of Education, Agriculture, at Public Works tapno marugian ti pre-procurement ken procurement procedures, ken maliklikan ti pannakaitantan iti proyekto.
Impettengna a panggepda nga aramaten ti summer season break tapno rugian ken makumpleto dagiti proyekto iti umno nga oras.
Dinakamatna metlaeng a dagiti lokal nga opisial ket kayatda a makipaset iti whole-of-government approach iti panangipatungpal kadagiti proyekto iti bukodda a lugar.
Karaman kadagiti prayoridad a proyekto iti panangibangon iti classrooms ken buildings, farm-to-market roads, ken dadduma pay nga infrastructure projects iti masakupanda a munisipyu, siudad, ken probinsia.
Impasigurado ni Mayor Waclin a saan a mapaay ti Itogon iti nasional a gobierno iti panangimplementar kadagiti proyekto ken impasiguradona a dagitoy ket maipatungpal a maibasar iti pagalagadan tapno agnumar ti publiko iti pakabuklan nga economic life iti proyekto.
