ABRA- Agpatpattaming iti pagagasan dagiti lima a biktima iti napasamak a pammaltog sadiay Calaba Bridge, Calaba, Bangued, Abra, pasado ala sais ti rabii idi February 24, 2026.
Nabigbig dagiti biktima a da Ezequiel Castañeda Parado, agtawen iti 35, Barangay Chairman ti Barangay Collago; Ailyn S. Parado, addaan iti umno nga edad, Sangguniang Bayan Member ken residente iti Brgy. Collago, Lagayan, Abra; Edron Salingbay, addaan iti umno nga edad, residente ti Collago, Lagayan, Abra; Arlene Dorias, addaan iti umno nga edad, residente ti Collago, Lagayan, Abra; ken Jaypee Soliba Gacayan, agtawen iti 38, awanan asawa, mannalon, manipud Nueva Era, ken agnanaed sadiay Brgy. Collago, Lagayan, Abra.
Maibasar iti inisyal nga imbestigasion dagiti otoridad, napasamak ti insidente bayat a nakalugan dagiti biktima a da Ezequiel ken Ailyn iti dark blue a Toyota Fortuner bayat a dadduma kadagiti biktima ket nakalugan met iti green a Nissan Frontier Pick-up.
Sigun iti Bangued Municipal Police Station, saan paylaeng a nabigbig dagiti suspek a nakalugan iti white pick-up.
Iti agdama, agtultuloy ti imbestigasyon dagiti otoridad iti napasamak nga insidente.
Maipatpatungpal metten ti hot pursuit operation para iti pannakabigbig ken pannakarestar dagiti suspek.
