Naipaayan ti gundaway dagiti limapulo ket siyam nga indibidual a naidarum iti 990-kilos drug haul idi 2022 tapno mangipila dagitoy ti counter-affidavits-da agingga inton Mayo a trenta, iti agdama a tawen.
Itay nabiit naangay ti preliminary hearing dagitoy iti Department of Justice no sadino naipaayan dagitoy ti kopya dagiti reklamo.
Naipaayan met dagiti saan a nakipaset iti nasao a hearing ti gundaway a makipaset iti sumaruno a hearing inton Mayo a dos.
Kabayatanna, maipalagip a nangrugi dagiti reklamo kalpasan a natakuatan ti insubmitir ti National Police Commission iti Department of Justice a Fact-Finding Inquiry Report dagitoy.
Nakasurat iti nasao a report nga inaristar ni Police Master Sergeant Rodolfo Mayo Jr. ti sigud a kameng ti Philippine National Police- Drug Enforcement Group iti naisayangkat nga operasyon iti maysa a lending agency.
Nupay kasta, patien ni Department of the Interior and Local Government Secretary Benhur Abalos, nga adda ti cover-up a napasamak kadagiti police officials ken officers a karaman iti nasao nga operasyon.
Malaksid iti dayta, natakuatan pay a saan a maitunos ti naisubmitir a report iti nasao nga operasyon iti naala a CCTV footage.
