BAGUIO CITY – Suratan ni Bangued Election Officer Atty. John Paul Martin dagiti amin a kandidato iti masakupanna a munisipyo sadiay Abra tapnu palagipan dagitoy.
Sigun kenkuana, ipalagipna iti suratna kadagiti kandidato a no mabalin ket aramiden wenno tungpalenda ti amin a sinapataanda kadagiti adu a peace covenant a pinirpirmaanda sakbay ken kabayatan ti election period.
Iti panakaiyuman ti Bombo Radyo, kinuna ti election officer nga isingirna bassit dagiti nailanad kadagiti katulagan a pinirpirmaan dagiti kandidato.
Impeksana a mano laengen nga aldaw ti nabatbati sakbay ti eleksion isut gapuna a nasken nga aramiden met dagiti kandidato dagiti pagrebbenganda.
Innayonna a sinuratanna metten dagiti barangay officials ken amin a government employees sadiay Bangued seknan iti saanda a panakipaset iti partisan politics ken ti panagbalin dagitoy a patas iti amin a gundaway.
Vote Counting Machines and other election paraphernalia
Kabayatanna, naamuan a naisangpeten iti provincial hub ti Abra a masarakan sadiay Ilocos Sur dagiti vote counting machines para iti probinsia.
Kinuna ni Atty. Martin nga addan ti personnel ti Cordillera PNP nga agbambantay iti nasao a disso.
