Rinugianen nga ipatungpal ti Department of Energy (DOE) ti maysa a baro a linawas a kampanya a naawagan kas “Oras Natin sa Efficiency” wenno ONE campaign tapno alukoyen ti publiko nga agtipid ti kuryente kas iti Earth Hour.
Iti sidung ti nasao a programa, alalukoyen ti nasao nga ahensya amin a pagtaengan, negosyo, pagadalan, ken dadduma nga organisasyon nga aramidenda dagiti addang partikular ti panangidep kadagiti saan a kasapulan a silaw ken i-unplug dagiti saan a maararamat nga appliances tunggal Sabado manipud 8:00 agingga alas-nuebe ti rabii.
Sigun iti Department of Energy, panggep ti nasao nga addang tapno makatipid ti enerhiya-banag a magun-od ti pagilian nu makisabay ti publiko.
Imbinglay pay ti nasao nga ahensya a mannarimaan ti pannakikoordinarda iti pribado a a sektor ken pagadalan tapno mapalawa ti nasao a kampanya.
Immunan a nairekord ti pannakakisay iti 145.43 megawatts a power demand wenno katukad iti konsumo ti agarup maysa a milyon a pagtaengan iti pagilian a Pilipinas kabayatan iti pannakaisayangkat ti Earth Hour ita a tawen.
Impasigurado ti nasao nga ahensiya nga awan ti power interruption a mapasamak iti baet ti isyu ti enerhiya iti pagilian. //bombokaren.c.s
