BAGUIO CITY – Naikkaten ti truck a naaksidente iti paset ti welcome arc ti siudad iti nagbaetan ti 2nd road Quezon Hill road ken Naguilian road idi agsapa.
Maibasar iti inisyal nga imbestigasyon, naglaon ti truck ti agarup 20 a tonelada ti tiles.
Gapu iti dayta, napukaw ti suplay ti kuryente iti sumagmamano a paset ti Naguillian Rd., paset ti MRR Queen of Peace, paset ti Quezon Hill Proper, San Roque Village, Dominican Hill – Mirador, Lourdes Subdivision Proper, Lower Lourdes Subdivision, ken daduma pay a paset ti Victoria Village.
Nangitunda pay daytoy iti temporaryo a panakaiparikep ti 2nd road ti Quezon Hill road nu sadino temporaryo a nagna dagiti motorista iti 1st road ken 3rd road ti Quezon Hill road.
Iti panakiuman ti Bombo Radyo iti driver ti truck, kinunana a bayat a sumangsang-at ti truck iti 2nd road ti Quezon Hill, simmardeng daytoy gapu ta naipit ti kambyo-na.
Bimmaba ti driver ken ti kadwana a pahinante tapno kalsoanda ti lugan ngem kellaat a limmukay ke nagsentro ti kambyo daytoy rason a nangitunda iti panag-atrasna agingga a nadungparna ti dua a poste ti kuryente.
Impasigurado met ni Rafael Valencia, dadaulo ti 911 On Call Baguio a dagus a masolusyonan ti nasao a pakaseknan babaen iti full coordination dagiti maseknan.
Natalged ti kasasaad ti driver ken pahinante.
Agtultuloy ti panangtarimaan ti Benguet Electric Cooperative (BENECO) kadagiti dua a poste a nadadael iti nasao nga insidente.
Karaman kadagiti nagresponde ket Baguio City Police Office – Police Station 1, 911-On Call Baguio, Benguet Electric Cooperative, sumagmamano a telecommunication companies, residente ken daduma pay a maseknan.//Bombo Rob Dominguez & Bombo Marinel Rodrigo
