BAGUIO CITY – Pimmusay ti maysa a senior citizen bayat a nadangran ti apokona kalpasan a nairaman iti panagreggaay ti daga ti balayda sadiay Upper Cotcot, Bangao, Buguias, Benguet idi rabii.
Nabigbig ti senior citizen a ni Gloria Rolando Matias, 72-anyos a naideklara a dead on the spot.
Nabigbig met ti nadangran nga apokona a ni Ben Rafael Matias Langawan, 10-anyos nga iti agdama ket naka-admit iti pagagasan.
Sigun kenni Mayor Ruben Tinda-an, matmaturog dagiti biktima idi nargaay ti daga iti ngatuen ti balay dagitoy.
Gapu iti daytoy, nagaburan ti kanigid a paset ti pagtaengan dagiti biktima a nagresulta iti panakagabur met ti pimmusay a senior citizen.
Nagsagrap met iti dunor iti ulo ti apoko daytoy a naispal iti panagresponde dagiti kameng ti Municipal DRRM Council, Buguias Fire Station, Buguias Municipal Police Station ken dagiti maseknan a barangay officials.
