BAGUIO CITY – Pimmusay ti maysa a lalaki a pulis bayat a nadangran ti kadwana a babai a pulis kalpasan pinaltogan dagitoy ti maysa a police trainee sadiay Bangued, Abra idi parbangon idi kalman, August 16.
Nabigbig ti pimmusay a pulis a ni Patrotlman Jay Valdez Tabili bayat a ti nadangran a ti Patrolwoman Jemalyn Langgoyan.
Nabigbig met ti police trainee a suspek iti krimen a ni Joseph Langgoyan nga asawa ni Patrolwoman Langgoyan.
Sigun kenni PMajor Marcy Grace Marron, panakangiwat ti Abra PNP, dead on arrival iti ospital ni Patrolman Tabili a nagsagrap iti tama ti bala ti paltog iti ulo.
Kinunana a nagsagrap met iti tama ti bala ti paltog iti tiyan ni Patrolwoman Langgoyan nga ita ket agpapaimbag iti ospital sadiay Abra.
Naduktalan iti inisyal nga imbestigasyon nga ala-una ti parbangon idi sinarungkaran ti police trainee ti asawana iti ab-abanganda nga apartment.
Nupay kasta, nadanunan ti suspek nga agkadwa ti asawana ken ni Patrolman Tabili.
Mapapati nga addaan iti relasyon ti dua a biktima nga agpada a nakadestino iti Bucloc Municipal Station.
Patien met dagiti imbestigador a love triangle ti motibo iti pammaltog.
Narekober iti crime scene ti maysa a caliber 45 ken 9mm a paltog.
Nakabaluden ti suspek.
