Tinatapos na ng pamahalaang lungsod ang listahan ng mga benepisyaryo ng rice at food assistance para sa mga indigent, na popondohan ng PHP56 milyong bahagi nito mula sa LGSF-FA.
Ayon kay Mayor Benjamin Magalong, maaaring agad na maipamahagi ang tulong matapos ang registration at paglilinis ng listahan. Nilinaw niyang walang politiko, kabilang siya, ang sangkot sa proseso na pinangangasiwaan ng CSWDO.
Inilabas na ng CSWDO ang mga patakaran para sa pamamahagi ng bigas, na layong tulungan ang mahihirap at bulnerableng sektor sa gitna ng pagtaas ng presyo ng bilihin. Ang programang ito ay bahagi ng DBM-DILG Joint Circular No. 1, s. 2026.
Nagpasalamat si Magalong sa pagkakasama ng lungsod sa programa, na makatutulong laban sa epekto ng mataas na presyo ng langis. Bukod pa ito sa naunang ayuda ng lungsod, tulad ng PHP5,000 para sa mahigit 1,300 jeepney driver at kasalukuyang PHP3,000 para sa taxi drivers. May nakalaan ding tulong para sa iba pang sektor tulad ng turismo.
Nagsimula ang CSWDO ng registration at assessment noong Abril 13 sa iba’t ibang barangay. Ayon kay CSWD Officer Liza Bulayungan, may nakatakdang schedule at lugar para sa maayos na pagsusuri. Kabilang sa maaaring makinabang ang mga indigent, senior citizens, solo parents, PWDs, at maging minimum wage earners basta residente ng lungsod.
