BAGUIO CITY – Manamnama nga agbalin a namaris ti panagsarungkar dagiti kandidata ti Miss Universe ditoy siudad ti Baguio inton Enero 18.
Gapu paylaeng daytoy iti nagduduma a kita ti napnuan maris a sabsabong a maiyarkos kadagiti mini-floats a pagluganan dagiti beauty queens, pakairamanan dagiti orchids a kiniddaw a mismo dagiti Miss U organizers a mainayon iti disenyo.
Sigun kenni Hotel and Restaurant Association of Baguio (HRAB) media officer Andrew Pinero, maarkosan kadagiti sabong a mangisimbolo iti Luzon, Visayas ken Mindanao ti umuna agingga maikatlo a float ken ti maikapat ket ti float ti Baguio Country Club a pagluganan ni reigning Miss Universe Pia Wurtzbach.
Impanamnamana met a napintas ti pagbalinan dagiti floats gaputa ti agaramid kadagitoy ket ti nangaramid a mismo iti Hall of Famer iti Panagbenga Float Parade.
Agrikos dagiti floats manipud Upper Session Road agingga iti South Drive ken agleppas daytoy iti Baguio Country Club a pakaipatungpalan dagiti nagduduma nga aktibidad dagiti kandidata.
Kabayatanna, kinunana a malaksid kadagiti pulis ti Baguio City ket mangipatulod iti augmentation force ti Police Regional Office-Cordillera malaksid pay kadagiti sumagmamano a volunteers.
Kabayatanna, inaklon ni Pinero a saanda a sigurado no maaddan ti signal jam kadagiti cell sites iti nasao nga adlaw a kas iti naituding a maaramid kadagiti lugar a sarungkaran dagiti dadduma a kandidata.
Ita nga aldaw met maangay ti press conference para paylaeng iti umadani a panagsarungkar dagiti beauty queens a tampok iti prestihiyoso a pasalip.
