BAGUIO CITY – Inyunay-unay manen ti Chief of Hospital ti Benguet General Hospital (BeGH) ti panagsurot dagiti umili ti probinsia kadagiti paglintegan kontra iti COVID-19 kasaruno ti panakaipasidong ti Benguet iti Modified Enhanced Community Quarantine.
Kagiddan iti daytoy ket sinaggaysa ni Dr. Meliarazon Dulay ti sitwasyon ita ti BeGH.
Kinunana a kanayon a mapupunno ti ospital, pakairamanan dagiti dadduma pay nga ospital iti probinsia ken innaldaw nga adu dagiti nakapila a pasyente ti COVID-19 sadiay BeGH nga adda iti nakaro ken kritikal a kondisyon.
Imbinglayna nga iti napalabas a dua a dominggo ket innaldaw nga innem agingga pito a pasyente ti COVID-19 ti ak-akomodaren dagitoy ken iti nasao metlaeng a panawen ket nailistada ti 13 nga ipupusay a katukad ti maysa nga ipupusay iti innaldaw.
Inyunay-unay metlaeng a nabambannogen dagiti health care workers iti BeGH malaksid pay nga agkurkurang ita ti nagduduma a suplay iti BeGH kas iti PPEs, agas ken oxygen gapu iti napartak a panagkonsumo kadagitoy.
Innayonna a binulan a P1-M ti magasgastosda a panggatang laeng ti oxygen para kadagiti pasyente ti COVID-19.
Mangnamnama pay ni Dr. Dulay a kadagiti masungad nga aldaw ket ad-adu ti magatangda a suplay para kadagiti pasyente ti COVID-19 nga adda ita iti BeGH.
