BAGUIO CITY – Nailukat kadagiti umili ti Baguio dagiti kangrunaan a parke ditoy siudad kagiddan ti virtual a selebrasyon ti maika-111 a charter anniversary ti Baguio City nga addaan tema nga “Angat Tayo Baguio”.
Nangrugi metten ita nga aldaw ti tallo nga aldaw a dry-run dagiti nagduduma nga aktibidad kadagiti kangrunaan a parke, partikular ti boating iti Burnham Lake, panagbisikleta iti Burnham Park ken horseback riding iti Wright Park.
Maisayangkat ti dry-run sakbay ti pormal a panagluklat dagiti parke ti Baguio inton Biyernes, September 4.
Kabayatanna, nagserbi a kangrunaan a sangaili ti Baguio Charter Day ni Tourism Secretary Bernadette Romulo-Puyat.
Nagbalin a limitado ti programa a naangay iti Baguio Convention Center no sadino, nabigbig wenno napadayawan dagiti frontliners gapu iti kinatured ken sakripisyoda iti kampanya kontra iti COVID-19.
Maipalagip a ti tinawen a September 1 ket special non-working holiday ditoy Baguio City kas selebrasyon ti Charter Day daytoy iti bileg ti Republic Act 6710.
