BAGUIO CITY – Tinagiragsak dagiti nagduduma nga indibidwal ti naisayangkat a maika-pito a fishing tournament idiay Burnham Park ita nga aldaw.
Karaman kadagiti nakipaset iti torneo ket dagiti residente ti siudad, turista ken dagiti bisita a nagtaud iti daduma a pagilin.
Iti interview ni Bombo Jez Lapizar kenni Rafael Serrano, Fishing Tournament Coordinator, nangrugi iti alas siete y media ti agsapa ti torneo nu sadino adda pay dagiti last minute a nagparehistro para iti daytoy.
Dumnaon iti tallo pulo nga indibidual ti nakipaset iti fishing tournament ita a tawen.
Impasigurado met ni Serrano a saan a daytoy ti maudi a fishing tournament gapu ta inton Setyembre uno ket maipatungpal ti kapada a torneo kas paset ti panakalagip ti Baguio Day.
Kabayatanna, maragsakan ken nasorpresa ni Jim Griffiths manipud United Kingdom, maysa kadgaiti nakipaset iti 7th Fishing Tournament gapu ta nakasaraken ti mabalin a pakaangayan ti fishing activities iti nangato a lugar ti siudad.
Nagleppas met ti Fishing Tournament iti alas dies y media ti agsapa ken manamnama a maiwaragawag dagiti nangabak kalpasan ti measuring dagiti nakalap a lames ita met laeng nga aldaw.
