BAGUIO CITY – Nakemmegen ti mabigbigbig a maikapito a most wanted person ti probinsia ti Benguet.
Nabigbig daytoy a ni Sherwin Galingon Bilog, 40-anyos, naasawaan, tubo ti Bontoc, Mountain Province ken residente ti Irisan, Baguio City.
Nakemmeg daytoy babaen iti bileg ti warrant of arrest nga impaulog ni Presiding Judge Amylesha Macaraeg ti Municipal Trial Court, 1st Judicial Region, La Trinidad, Benguet gapu iti kaso a robbery nga addaan ti piyansa a P36,000.
Sigun kadagiti pulis, ni Bilog ket mapapati a miembro ti Jepson Beligen Bolt-Cutter- Acetylene Robbery Group a maaw-awagan metlaeng iti Sagandoy Acetylene Group a maysa a criminal gang nga addaan iti operasyon iti entero a pagilian.
Nakemmeg ni Bilog sadiay Km. 3, Pico, La Trinidad, Benguet idi malem kalman babaen iti nagtipon a pwersa ti tracker team ti La Trinidad Municipal Police Station, Benguet Provincial Police Office, Regional Intelligence Division ken ti Kabayan Municipal Police Station.
