Tinagiragsak dagiti nakipaset nga umili ken turista ti panakarambak ti Cordillera Festival of Festivals a nangrugi iti alas ocho ti agsapa ita nga aldaw.
Impabuya dagiti innem a probinsiya ken dua a siudad ti indigenous festivals dagitoy a napnuwan iti tradisyon ken kultura.
Iti panakiuman ti Bombo Radyo kenni Jovita Ganongan, Regional Director ti Department of Tourism – Cordillera, panggep ti aktibidad nga ipakaammo iti publiko nga adda ti festival ti nagduduma a probinsiya iti rehiyon.
Innayon a tampok ditoy ti nagdudum a traditional beliefs nu sadino maipakpakita daytoy babaen iti theatrical manner a napakuyogan ti street dancing ken showdown.
Dagiti nagpabuya ken naipabuya ket Say-am Festival iti Apayao, Kawayan Festival iti Abra, Adivay Festival iti Benguet, “Kulpi Ad Ifugao” iti Ifugao, Bodong Festival iti Kalinga, Lang-ay Festival iti Mt. Province, Panagbenga Festival iti Baguio City ken ‘Kopyan Chi Matagoan’ ti Tabuk City.
Temporaryo a naiparikep ti maysa a linya ti kalsada iti Session road para iti naipatungpal a parada a nagleppas iti Malcolm Square, Lower Session Road.
Kabayatanna, naideploy dagiti kameng ti Baguio City Police Office para iti crowd control ken panakaimando ti gunay ti trapiko.
