Saan pay laeng a makitkita ti Malacanang ti kinakurang ti suplay ti kuryente ken produkto a lana iti pagilian iti baet ti nabara a tensyon idiay Middle East.
Sigun kenni Palace Press Officer Undersecretary Claire Castro, awan pay laeng ti pangta ti “energy lockdown” iti pagilian.
Innayonna nga iti agdama, saan pay laeng a dimmanon ti pagilian a Pilipinas iti sitwasyon kas iti napasamak idi dekada ’70 no sadino naaddaan iti fuel rationing ken carless days.
Impanamnama met ti Palace Official a kas paset iti contingency plan ti agdama nga administrasyon, mannarimaan ita ti panangbirok ti Department of Energy (DOE) ken Department of Foreign Affairs (DFA) kadagiti alternatibo a pagalaan ti suplay ti petrolyo malaksid idiay Middle East.
Dinakamat metlaeng ni Undersecretary Castro a mannarimaan ti koordinasyon ti DOE kadagiti pagilian nga India, Argentina, ken Canada tapno masigurado ti agtultuloy nga imbentaryo ti produkto a petrolyo iti pagilian. //bombokaren.c.s
