Linapdan idi laeng kalman dagiti kameng ti Presidential Anti-Organized Crime Commission (PAOCC) ti manager iti na-raid a Philippine Offshore Gaming Operator (POGO) hub idiay Porac, Pampanga a rumuar iti Pilipinas.
Sigun kenni PAOCC spokesperson Dr. Winston Casio, maysa gamin ti manager kadagiti persons of interest dagiti otoridad nga adda pakainaiganna iti nasao a hub.
Gapu iti dayta, posible a maiturong ti manager idiay Manila ita nga aldaw manipod Davao City.
Maipalagip a sinerrek dagiti otoridad ti hub idi Hunio ken naispalda ti sangagasut lima pulo ket walo a ganganaet.
Kabayatanna, immuna a kinuna ti Philippine Amusement and Gaming Corporation a maysa kadagiti uppat a pulo ket innem a pasdek iti uneg ti Lucky South 99 Corp ket naipaayan ti permit nga ag-operate.
Para iti nasao a korporasio, pinaglibakanda amin nga adda ti mapaspasamak nga iligal nga aktibidad iti hub.
