BAGUIO CITY – Adu ladta nga illegal traders ti manggungundaway kadagiti consumers maipapan iti panangpabaro iti luma a tangke iti rehiyon Cordillera.
Iti panakiuman ti Bombo Radyo kenni Arnel Ty, Presidente ti Liquefied Petroleum Gas Marketers Association (LPGMA), adu ti naawatda a report maipapan iti nasao a banag partikular iti probinsiya ti Benguet ken Region 2.
Sigun kenni Ty, mapaspasamak ti iligal nga aktibidad gapu ta saan nga ammo dagiti consumers ti karbenganda isu a mapuerpuersada a mangipatronize kadagiti unsafe cylinders.
Malaksid iti dayta, kurang ti personnel ti Department of Energy para iti panakaipatungpal ti baro a linteg isu’t gapu na a gungundawayan met dagitoy dagiti iligal a traders.
Nupay kasta, kinunana a tumulong dagitoy iti panakaiwaras ti umno nga impormasyon kadagiti consumers maipapan iti karbenganda iti pananggun-od ti napintas a cylinder.
Impetteng pay ni Ty nga iti sidong ti Republic Act 11592, karbengan dagiti consumers a mangidemand kadagiti luma a tangke dagitoy iti napintas, baro ken requalified a cylinder.
Inlawlawag ni Ty a libre ti panangisukat kadagiti luma a tangke gapu ta naimandato dagiti brand owners a dagitoy ti mangbaklay iti panagsukat ken panangpabaro kadagitoy.
Gapu iti dayta, kidkiddawen ti opisyal nga isukat ti luma a tangke dagitoy kadagiti suppliers/dealers gapu ta karbengan dagiti consumers nga agdemand iti napintas a cylinder.//Marinel Rodrigo
