BAGUIO CITY – Sinuspindir ti City Council ti Baguio ti implementasyon ti mandatory a dog microchipping bayat a maur-uray paylaeng ti Implementing Rules and Regulations (IRR) ti Ordinance 60-2020.
Nakedngan ti nasao nga addang kalpasan a kiniddaw ti adu a dog owners iti siudad ti saan a panakaituloy ti ‘mandatory’ panakaipakabil ti microchip kadagiti tarakenda nga aso.
Impetteng dagiti nasao a dog owners nga iti RA 9482 wenno Anti-Rabies Act of 2007 ket nailanad a ti panangiparehistro iti taraken ti ‘mandatory’ saan ket a ti panangipakabil iti microchip iti taraken.
Inyunay-unayda pay a para laeng iti record purposes ti microchip ken saan a pudno a makatulong daytoy iti panakabiruk dagiti agwalang-walang nga aso.
Kinunada metlaeng a ti ‘mandatory’ a panagipakabil iti microchip ket panaglabsing iti karbengan ti pet owner nga agdesisyon no anya ti kasayaatan para iti taraken dagitoy.
Linawlawagan met ni City Veterinarian Dr. Brigit Piok a ma-assess pay ti sasaaden ti salun-at dagiti taraken nga aso sakbay dagitoy a makabilan ti microchip.
Pinagyamanan met ni Councilor Joel Alangsab, awtor ti ordinansa ti panangipeksa dagiti maseknan a dog owners iti ‘objective’ position dagitoy iti nasao nga ordinansa.
Sigun met kenni Councilor Philian Weygan-Allan, co-author ti ordinansa, mabalin a maaksionan dagiti pakaseknan dagiti dog owners babaen iti panaka-amyendar ti linteg.
Gapu iti daytoy, naaprobaran ti resolusyon ti mosyon para iti panakasuspindir pay ti implementasyon ti ordinansa ken naisumitiren daytoy iti opisina ni Mayor Benjamin Magalong.
Linawlawagan pay ti City Council a mabalin latta nga iparehistro ken ipa-microchip dagiti pet owners dagiti taraken la ketdi kayatda daytoy iti baet nga adda ti suspension iti nasao nga ordinansa.
