Inaprobaranen ni President Ferdinand Marcos Jr. ti panangipaay ti service recognition incentives (SRI) para kadagiti mangmangged iti gobierno, pakairamanan dagiti nakauniporme para iti fiscal year 2024.
Daytoy ket nasurok makalawas sakbay ti panagrambak ti Paskua.
Impaulog idi kalman ni Executive Secretary Lucas Bersamin ti Administrative Order No. 27 babaen ti pannakabalin ni President Marcos Jr.
Ti Administrative Order No. 27 ti nangipalubos iti panangipaay ti one-time service recognition incentives (SRI) iti uniform rate a P20,000 ti tunggal maysa, nga awaten dagiti sibilian ken military government personnel a nasapsapa ngem Disiembre 15, 2024.
Saklawen ti panangipaay ti service recognition incentives (SRI) ket dagiti civilian personnel iti nagduduma nga ahensia ti gobierno, pakairamanan dagiti mangmangged iti state universities and colleges (SUCs) ken government-owned wenno -controlled corporations.
Malaksid iti dayta, dagiti makaawat pay iti insentibo ket dagiti military personnel manipod Armed Forces of the Philippines (AFP) iti sidong ti Department of National Defense, dagiti uniformed personnel ti Philippine National Police, Bureau of Fire Protection, Bureau of Jail Management and Penology iti sidong ti Department of the Interior and Local Government, ti Bureau of Corrections iti sidong ti Department of Justice, ti Philippine Coast Guard iti sidong ti Department of Transportation, ken ti National Mapping and Resource Information Authority iti sidong ti Department of Environment and Natural Resources.
